Scuru niguru
‘Un mu recordu
nu niguru e chissi …:
mancu quannu aviamu sulu
tri nuci e due cachissi!
Para ca l’animu unn’ava cchjiu ‘ abbatteri
u n’appiccia ‘e stille …;
para ca ancunu cce minta lena
u ni ruppa ‘e ncille.
Duve senti senti sulu malanni,
e vidi sulu ossa e patute
c’aballarianu intra i panni.
Ancunu dicia
ca mo’ c’arriva a Primavera,
s’acconza propriu tuttu
puru cu non sperava, acchjiappa e spera …
A luce, ch’e’ juta scumparuta,
a pocu a pocu nescia ‘ e ancuna banna
e ni lucia nvisu comu na riruta,
ni chjiova supra a capu comu a manna.
A na vota u munnu ncigna u gira ancora e s’arrecorda,
pure e chine, mpamiu, a cuscienza l’ava lorda.
Però Eiu signu unu ‘e chilli
ca resta quetu quetu, ma s’apprica assai,
s’arrumbugghjia dintra a vita soa com’era arretu,
si mpincia allu jornu novu e ‘un lu lassa mai!
Guido Capilupi
